Om konserten: 

På denne konserten samlar vi opp trådane, alle komponistane møter kvarandre, og vi skaper ei stor felles musikalsk avslutning på festivalen, der vi har med oss heile veka som bakteppe. På programmet står alle urframføringane vi har hatt under tonehimmel 2023. For somme vert det gjenhøyr, for andre vert det fyrste gongen. 

For oss er det viktig med andregongsframføring av dei nyskrivne verka, for samtidsmusikk er slettes ikkje berre det heilt nye. Samtidsmusikk er tonehistorier, fortalde og skapte av menneske som lever her og no i same tid og verd som deg. Ei god historie burde ein fortelje mange gongar, meiner vi, og gler oss til å vise dykk desse verka i eit meir tradisjonelt konsertlokale, som kanskje gir deg høve til å oppleve musikken på ein annan måte enn på utekonsertane.