Unni Løvlid er ein folkesongar frå Hornindal. Ho er soloutøvar, solist og ensemblemusikar, og ho arbeider innanfor feltet folkemusikk og samtidsmusikk.

Løvlid er ein av våre mest ettertrakta folkesongarar. Ho har røtene sine i folkemusikken, men i heile karrieren sin har ho også arbeidd med samtidsmusikk. Som utøvar har ho valt å jobbe breitt med alt frå barnekonsertar til å vere solist med orkester, jobba med band, og gjennomført samarbeid med songarar som EVA-quartet og Annie Ebrel. Ho har turnert store delar av verda og gitt ut produksjonar som So ro liten tull, Vita, Rite, Lux, Hymn og Seven winds.  I 2022 gav ho ut albumet Unamna saman med Ingfrid Breie Nyhus og Anne Hytta, der dei har arbeidd med folketonane Edvard Grieg brukte i sitt opus 66. Saman med Marianne Baudouin Lie (cello) har ho duoen Svarteboka, der dei går inn i ulike typar av tonalitet frå eit musikarperspektiv.

Unni Løvlid er førsteamanuensis og leiar av folkemusikkstudiet ved Noregs musikkhøgskole og frilansutøvar.

Ho har motteke fleire prisar og utmerkingar, mellom anna Statens kunstnarstipend, Gammelengprisen og Spellemannprisen.